الرئيسية

موائد افطار رمضانية تمت بالتشبيك مع المجتمع المحلي في مركز ارابيسك المجتمعي

موائد افطار رمضانية تمت بالتشبيك مع المجتمع المحلي في مركز ارابيسك المجتمعي

رمضان شهر الخير واللمة الحلوة, من هنا انطلقت فكرة "رمضان بيجمعنا" حيث اقام فريق الجمعية السورية للتنمية الاجتماعية بالتعاون مع مفوضية الامم المتحدة لشؤون اللاجئين في مركز أرابيسك المجتمعي بحلب بالتشبيك مع أشخاص من المجتمع المحلي لتحضير موائد إفطار رمضانية تم فيها تقديم وجبات ومشروبات رمضانية لـ 1200 شخص توزعوا على ثمانية افطارات وسهرات تضمنت فقرات نقاش عائلية حول العادات الرمضانية والعيد تلاها طروحات تناقش فيها الأهالي وعرضوها على الموجودين بأسلوبهم الخاص إما عن طريق هنهونة أو مسرحية أو اغنية أو قصة , زينت السهرات فقرة الحكواتي التي تضمنت سرد حكايات وتعريف عن الجمعية والخدمات التي تقدمها ومشهد مسرحي وفوازير تهدف إلى دعم الأسرة والتماسك الأسري والمجتمعي في المنطقة .

أعادت هذه الإفطارات للعائلات المتواجدة لمة الأسرة الكبيرة وتمت بمساعدة يافعين ويافعات من المنطقة, عبر الأهالي عن فرحهم بهذه الافطارات حيث قالو:

- السعادة بكتير من الأحيان بتكون باب بينفتح على صوت ضحكات الأطفال، شكرا لأنكن نفضتوا غبرة الحرب وساعدتونا حتى نشوف جمال الحياة.

- أنا صرلي خمس سنين ما شعرت بلمة العيلة برمضان بس اليوم معكم حسيت كأني ببيتي بأيام رمضان قبل الأزمة.

- حبينا الطريقة التي رحبتوا فينا فيها والمسرحية ذكرتنا بأهلنا يلي سافروا.

- ما كان عندي قدرة جيب هيك أكل لولادي واليوم أنا فرحانة لأني ولادي أكلوا وانبسطوا.

- معقول الله حققلي حلمي، كنت بحلم نقعد انا وانتي بشي محل قعدة حلوة ولفلك قطعة كباب وطعميكي ياها بايدي، وهلئ تحقق الحلم.

- حسيت حالي بمطعم من مطاعم اوربا لانو بعمري ماتخيلت إني افطر بمطعم عادي حتى.

- شكرا الكن متل ماخففتوا همومنا وفرحتوا قلوبنا والله يكتر من امثالكم ويعطيكم ألف عافية عم نحسكن متل أهلنا واكتر.

- اليوم انا كتير مبسوطة بهل إفطار بعمري ما كنت متخيلة انو نفطر هيك فطور انبسطنا وحسينا بالفرحة نحنا وولادنا وحسينا انو نحنا كلنا عيلة وحدة.

- شكرا الكن على هل شي يلي عم تعملوه ساويتو بهجة بكل منطقة قاضي عسكر وباب الحديد.

- كل شي عجبني اليوم انا من 30 سنة ماقضيت هيك وقت وضحكت من قلبي.

- عبر طفل "هاد الشي يلي عم يصير اليوم بس كنت شوفه بالتلفزيون وكنت مفكرها تمثيل بس طلعت حقيقة وانا عم عيشا"

- قال طفل آخر" انا من زمان كتير ما اكلت مشاوي ولا شميت ريحتا وانا اليوم فرحان ومبسوط كتير لاني اكلت مشاوي"

- عبر رجل " الشباب والصبايا يلي موجودين بالمركز هنن يلي عم يزرعو فينا وبالمكان روح الحيوية والتطوع شجعتونا على شغلات وزرعتوها فينا ما كنا نتخيل او تخطر ببالنا حتى انو نحنا ممكن نساويها".

- قال رجل آخر " حسستونا باجواء المحبة والالفة يلي خسرناها من زمان من وقت الحرب.

- قال رجل آخر " مشكورين انتم في القلب, مركز أرابيسك شكرا ع الشي يلي عم تعملوه عم تنمو مواهب الأطفال والكبار وجميع الاعمار"

- وقام مجموعة من الرجال بتقديم هنهونة بالقول "فطور وفطرنا، والاكل الطيبة اكلنا، وللجيران سكبنا، والقرايب عزمنا، وع السحور تجمعنا، وكعك العيد حضرنا، ولبس العيد اشترينا، ورمضان يجمعنا"

01-06-2018